தமிழகத்தில் ஊழலை ஒழிக்கும் நோக்கில், பல்வேறு மாவட்டங்களில் உள்ள தாலுகா அலுவலகங்களில் லஞ்ச ஒழிப்புத்துறை போலீசார் ஒரே நேரத்தில் அதிரடி சோதனையில் ஈடுபட்டனர்.
[சென்னை]: தமிழகம் முழுவதும் உள்ள பல்வேறு தாலுகா அலுவலகங்களில் லஞ்ச ஒழிப்பு போலீசார் அதிரடி சோதனையில் ஈடுபட்டனர். அரசின் இந்த அதிரடி நடவடிக்கையால் வருவாய்த்துறை வட்டாரங்களில் பெரும் பரபரப்பு ஏற்பட்டுள்ளது.
புதுக்கோட்டை, திருவண்ணாமலை, கொடைக்கானல், மேல்மலையனூர், உடுமலை, நாமக்கல், திருவாரூர் மற்றும் கரூர் உள்ளிட்ட பல ஊர்களில் உள்ள தாலுகா அலுவலகங்களில் லஞ்ச ஒழிப்பு போலீசார் இந்த திடீர் சோதனையை மேற்கொண்டனர் .மேலும், திருநெல்வேலி மாவட்டம் திசையன்விளை, கோபிசெட்டிபாளையம், கோவை வடக்கு, வாணியம்பாடி, தென்காசி, வேதாரண்யம், குமாரபாளையம் ஆகிய இடங்களிலும் இந்த அதிரடி வேட்டை நடைபெற்றது. .
விஜய் தலைமையில் புதிய தமிழக அரசு பொறுப்பேற்ற பிறகு, லஞ்சம் மற்றும் ஊழலுக்கு எதிராக கடுமையான நடவடிக்கைகள் முன்னெடுக்கப்பட்டு வருகின்றன. லஞ்சம் கோரும் அதிகாரிகள் குறித்து பொதுமக்கள் உடனடியாக புகார் அளிக்க ஏதுவாக, பிரத்யேக வாட்ஸ்அப் எண் மற்றும் இ-மெயில் முகவரி உள்ளிட்டவை சமீபத்தில் அறிமுகம் செய்யப்பட்டுள்ளன
இதன் தொடர்ச்சியாக, வெள்ளிக்கிழமைகளில் அரசு அலுவலகங்களில் லஞ்ச ஒழிப்புத்துறையினர் தொடர் சோதனைகளை நடத்தி வருகின்றனர் . குறிப்பாக, பத்திரப்பதிவு அலுவலகங்கள் மற்றும் உள்ளாட்சி அமைப்புகளில் நடத்தப்பட்ட சோதனைகளின் போது லஞ்சப்பணம் பறிமுதல் செய்யப்பட்டதுடன், பல அதிகாரிகள் கைது செய்யப்பட்டு வழக்குகளும் தீவிரமாக விசாரிக்கப்பட்டு வருகின்றன.
அரசின் இந்த தொடர்ச்சியான ஊழல் தடுப்பு நடவடிக்கைகளாலும், அனைத்து இடங்களிலும் ஒரே நேரத்தில் நடக்கும் அதிரடி வேட்டைகளாலும், லஞ்சம் வாங்கிய அதிகாரிகள் மத்தியில் கடும் பீதி நிலவுகிறது. அரசு அலுவலகங்களில் வெளிப்படைத்தன்மையை உறுதி செய்யும் வகையில் இந்த சோதனைகள் அடுத்தடுத்த கட்டங்களுக்கு நகரும் என எதிர்பார்க்கப்படுகிறது.
எந்தவித பாரபட்சமுமின்றி அரசு அலுவலகங்களில் நடைபெறும் ஊழல்களை ஒடுக்கும் வகையில் லஞ்ச ஒழிப்புத்துறையின் இந்த சோதனைகள் தீவிரப்படுத்தப்பட்டுள்ளன. லஞ்ச ஊழலுக்கு எதிரான இந்த கடுமையான நடவடிக்கைகள் மூலம் நேர்மையான நிர்வாகத்தை வழங்கும் அரசின் செயல்பாடுகள் முக்கியத்துவம் பெறுகின்றன.
